Bakıda güləş üzrə Avropa Olimpiya təsnifat turniri keçiriləcək. Müvafiq qərar Dünya Güləş Birliyinin (UWW) İcraiyyə Komitəsinin iclasında verilib. Bu haqda bu gün, 28 iyun tarixində Bakuplus.az Report-a istinadən məlumat verir.
Gələn il aprelin 4-dən 7-dək keçiriləcək Avropa Olimpiya Təsnifat turnirinə ev sahibliyi etmək üçün Bakıdan başqa, Tbilisi, Roma, Skopye və Varşava da öz namizədliklərini irəli sürüb.
Azərbaycan idmançıları hər çəki dərəcəsində iki lisenziya uğrunda mübarizə aparacaqlar. Yarışların Milli Gimnastika Arenasında keçirilməsi planlaşdırılır.
İclas zamanı qəbul olunmuş qərarlara əsasən, Pan-Amerikan Təsnifat turniri 15-17 martda Akapulkoda (Meksika), Afrika-Okeaniya Təsnifat turniri 22-24 martda Qahirədə (Misir), Asiya Olimpiya Təsnifat turniri isə 12-14 apreldə Bişkekdə (Qırğızıstan) baş tutacaq.
Hər bölgə üzrə hər çəki dərəcəsində yalnız iki güləşçi Paris 2024 Olimpiya Oyunlarında iştirak etmək üçün lisenziya alacaq. Olimpiada üçün son lisenziyalı yarış olan Dünya Olimpiya Təsnifat Turnirində hər çəkidə üç idmançı lisenziya qazanacaq. Bu yarışlar mayın 9-dan 12-dək İstanbulda keçiriləcək.
İlk lisenziyalı güləş yarışı bu il sentyabrın 16-dan 24-dək Serbiyanın paytaxtı Belqradda keçiriləcək dünya çempionatıdır. Bu turnirdə idmançılar hər çəki dərəcəsində beş lisenziya uğrunda mübarizə aparacaqlar.
Ümumilikdə Dünya Çempionatında 90 lisenziya sahibi, regional təsnifat turnirlərində 144 lisenziya sahibi (dördünün hər birində 36), Dünya Olimpiya Təsnifat Turniri çərçivəsində isə 54 lisenziya sahibi müəyyənləşəcək.
