Bakıda keçirilən FİDE Dünya Kubokunda iranlı şahmatçı Sara Xadem iştirak edəcək. Bu haqda bu gün, 31 iyul tarixində Bakuplus.az FİDE-nin saytına istinadən məlumat verir.
2022-ci ildə Qazaxıstanda keçirilən turnirdə 26 yaşlı Sara Xadem hicabı çıxararaq İranın qanunlarını pozub və ölkəyə qayıtmaqdan imtina edib. Yarış bitdikdən dərhal sonra şahmatçı ailəsi ilə İspaniyaya yola düşüb.
FİDE-nin Rapid və Blits üzrə Dünya Çempionatında hicabsız yarışan beynəlxalq qrosmeyster Sara Xadem Bakıda İspaniyanı təmsil edir.
Şahmat üzrə Dünya Kuboku iyulun 29-dan avqustun 25-dək Bakıda keçirilir.
Açıq nokaut turnirində 206 idmançı, qadınların yarışında 103 şahmatçı iştirak edirlər. Hər iki turnirin mükafat fondu şahmat yarışı üçün ən böyük məbləğ – 2,5 milyon dollar təşkil edir.
