10 aprel görkəmli Azərbaycan güləşçisi İbrahimpaşa Dadaşovun doğum günüdür.
O, 1926-cı ildə Bakıda anadan olub.
62 və 67 kq çəki dərəcələrində güləşmiş İbrahimpaşa Dadaşov 1949, 1951, 1952 və 1956-cı illərdə SSRİ çempionatlarında qalib olub, 1954 və 1955-ci illərdə gümüş medal qazanıb, 1950-ci ildə bürünc medala layiq görülüb.
Sovet idmançıları üçün debüt olan 1952 yay Olimpiya oyunlarında sərbəst güləş yarışlarında iştirak edib, yeddinci yeri tutub. SSRİ əməkdar idman ustası və SSRİ əməkdar məşqçisi adlarına layiq görülüb. Bir çox güləş ustalarını yarışlara hazırlayıb. Dünya və Avropa çempionu, 1964 yay Olimpiya oyunlarının bürünc mükafatçısı Aydın İbrahimovun məşqçisi olub.
İbrahimpaşa Dadaşov 16 iyul 1990-cı ildə Bakıda vəfat edib.
Adına Bakının Binəqədi və Nərimanov rayonlarında küçə var.
