Bakının Binə Atçılıq Mərkəzində 5-8 noyabr tarixlərində Milli Atçılıq Festivalının cədvəli açıqlanıb. Bu haqda bu gün, 3 noyabr tarixində Bakuplus.az məlumat verir.
Tədbir Azərbaycan Respublikası Atçılıq Federasiyasının təşkilatçılığı ilə ümummilli lider Heydər Əliyevin 100 illik yubileyinə həsr olunub.
Festivalda yalnız milli cins atların – Qarabağ və Dilbaz atlarının iştirakı ilə Çövkən çempionatı, Cıdır yarışları və Yorğa qaçışları təşkil olunacaq.
Cədvələ əsasən, noyabrın 5-də saat 11:00-da qapalı manejdə festivalın təntənəli açılış mərasimi təşkil olunacaq. Həmin gün, açılış mərasiminin ardınca Çövkən üzrə Dünya Çempionatının ilk 3 oyunu keçiriləcək.
Növbəti gün çempionatın digər 3 oyunu səhər 11:00-dan etibarən oynanılacaq.
Çövkən çempionatında Azərbaycan, Türkiyə, Qazaxstan, Özbəkistan, Polşa və Mərakeş milliləri iştirak edəcək.
Noyabrın 7-də saat 11:00-da cıdır və yorğa qaçışlarına start veriləcək.
İştirakçılar 6 yorğa qaçışı və 5 cıdır qaçışı olmaqla ümumilikdə 11 qaçışda kuboklar uğrunda mübarizə aparacaqlar. Kuboklar işğaldan azad olunmuş 11 xüsusi ərazinin adı ilə adlandırılacaq.
Günün yorğa üzrə baş yarışının kubokunun adı “Şuşa”, cıdır üzrə baş yarışının kubokunun adı isə “Xankəndi” olacaq.
8 noyabr tarixində Çövkən üzrə Dünya Çempionatının üçüncülük uğrunda və final oyunları keçiriləcək. Günün ilk oyunu saat 11:00-da başlayacaq.
Bu gün saat 12:00-da Xəyal adasında yerləşən “Dreamland Golf Hotel” mehmanxanasında mətbuat konfransı keçiriləcək. Mətbuat konfransında Dünya Çempionatının püşkatması da təşkil olunacaq.
