Bakıda cərimələrini ödəməkdən yayınan sürücünün avtomobili saxlama meydançasına yerləşdirilib. Bu haqda BakuPlus.az Avtosfer.az-a istinadən bu gün, 4 noyabr tarixində xəbər verir.
“Həmin şəxslə bağlı qanuni tədbir görülüb, avtomobili saxlama meydançasına yerləşdirilib”, - Bakı Şəhər Dövlət Yol Polisi İdarəsinin baş inspektoru, polis mayoru Araz Əsgərli deyib.
“Bununla yanaşı bildirmək istəyirəm ki, belə hərəkətləri edən şəxslər unutmasınlar ki, etdikləri qayda pozuntusu olmaqla yanaşı, digər vətəndaşların da hüquqlarına, haqlarına müdaxilə etmək kimi qiymətləndirilir. Cəmiyyətdən bu cür şəxsləri ictimai qınaq obyektinə çevirməyi, bu tip hərəkətləri başqa sürücülərdə görən vətəndaşlardan polisə məlumat verməklərini də xahiş edirik ”, – deyə polis mayoru qeyd edib.
Sözügedən şəxs bəzi sürücülər kimi cərimədən yayınmaq üçün avtomobilin dövlət qeydiyyat nişanına müdaxilə edib. Belə etdikdə isə tamamilə fərqli bir avtomobilə məxsus dövlət nömrə nişanı ortaya çıxır. Cərimə yazılanda isə protokol başqa sürücüyə gedir.
Araz Əsgərli həm də sürücünün etdiyi hərəkətə görə əziyyət çəkən şəxslərin müəyyən edildiyini və protokollarının ləğv olunacağını da qeyd edib.
Sürücünün 1500 manat ödənilməmiş cəriməsi var və sürücü İnzibati Xətalar Məcəlləsinin 342.9-cu maddəsinə əsasən cərimələnəcək.
