Şağan Olimpiya İdman Kompleksində 16 yaşlı yeniyetməni öldürən gəncin atası danışıb. Bu haqda bu gün, 29 noyabr tarixində Bakuplus.az 1News-a istinadən xəbər verir.
Qətli törədən Ruslan Səfixanovun atası, Əməkdar məşqçi Elçin Səfixanov bildirib ki, gənclərin arasında ciddi mübahisə olmayıb.
“Mənə deyilənə görə, oğlum Turandan yol verməyini istəyib, Turan isə sərt cavab verib. Nəticədə dava yaranıb və məlum hadisə baş verib. Ruslan belə insan deyil”, - deyə o qeyd edib.
Həmçinin Elçin Səfixanov sosial şəbəkələrdə onlar barəsində deyilən şaiyələrdən narazıdır:
“Hər yerdə yazırlar ki, Ruslanın atası varlıdır, rüşvətlə məsələni həll edəcək və Turanın atası hakimdir Ruslan üçün maksimum cəza kəsəcəklər. Əslində isə mən məşqçi maaşına yaşayıram, o isə taksi işləyir”.
E.Səfixanov hələ də mərhumun ailəsi ilə görüşə bilməyib, ancaq bunu çox istəyir.
“Əgər mən bilsəydim ki, mənim ölümüm onların oğlunu geri gətirəcək, mən deyərdim ki, öldürün məni. Mən elə bilirəm ki, ölən mənim oğlumdur. Kaş ölərdim, bu günü görməyərdim”, - deyə o əlavə edib.
26 noyabr tarixində 20 yaşlı Ruslan Səfixanov Şağan Olimpiya İdman Kompleksində 16 yaşlı Turan Rüstəmovu bıçaqla qətlə yetirmişdir.
