Bakıda azyaşlıları dilənçiliyə sövq edən qadın polis tərəfindən tutulub. Bu haqda BakuPlus.az DİN-in mətbuat xidmətinə istinadən bu gün, 1 noyabr tarixində xəbər verir.
Bakı Şəhər Baş Polis İdarəsinin Yetkinlik Yaşına Çatmayanlarla Profilaktiki İşin Təşkili Bölməsi, Bakı Metropolitenində Polis Şöbəsinin əməkdaşları ilə birgə keçirilən tədbirlərlə Bakı metrostansiyalarında 4 azyaşlını dilənçiliyə sövq edən 38 yaşlı R.Məmmədova saxlanılıb.
R.Məmmədova öz qohumlarının övladlarını dilənçiliyə sövq etdiyinə görə barəsində İnzibati Xətalar Məcəlləsinin 523.2-ci maddəsi ilə inzibati xəta haqqında protokol tərtib olunub.
Nizami rayon məhkəməsinin qərarı ilə R.Məmmədova 10 gün müddətinə inzibati həbslə tənbeh edilib.
Azyaşlıların valideynləri Polis Şöbəsinə dəvət olunublar və profilaktik söhbətlər aparıldıqdan sonra övladları onlara təhvil verilib.
