Azərbaycan Dövlət İqtisad Universitetinin 4-cü kurs tələbəsi Ümid Rüstəmov iş axtararkən problemli vəziyyətə düşüb. Tələbə işə düzəlmək üçün şəxsi məlumatlarını başqa şəxsə ötürüb. Sonradan məlum olub ki, onun adına şirkət açılıb və həmin müəssisənin 127 min manat vergi borcu var. Bu haqda bu gün, 10 dekabr tarixində Bakuplus.az Xəzər Xəbər-ə istinadən məlumat verib.
Ümid Rüstəmov deyir ki, bir müddət əvvəl iş axtararkən iş elanı qruplarından birinə qoşulub və iş elanı sahiblərindən biri ilə əlaqə saxlayıb.
İşə düzəlmək üçün şəxsi məlumatlarını başqa tərəfə verən Ümid Rüstəmovun sözlərinə görə, şirkət onun ASAN imzası və şəxsiyyət vəsiqəsi ilə açılıb. Hazırda şirkətin külli miqdarda vergi borcu var. Bu səbəbdən onun ölkədən çıxışına qadağa qoyulub.
Ümid Rüstəmov bununla bağlı hüquq-mühafizə orqanlarına həm elektron, həm də yazılı müraciət etdiyini deyir.
