Bakıda həyat yoldaşı 10 qəpiyə görə ayaq yoluna buraxılmayan şəxs tualetin şüşələrini sındırdığı üçün həbs edilib. Bu barədə BakuPlus.az Qaynarinfo-ya istinadən bu gün, 4 iyul tarixində xəbər verir.
Hadisə dünən saat 18:30 radələrində "Koroğlu” metro stansiyasının çıxışında yerləşən sanitar qovşaqda baş verib.
33 yaşlı paytaxt sakini Elməddinin (şərti) həyat yoldaşı sanitar qovşağa gedib. O, həmin vaxt sanitar qovşağın kassiri ilə arvadı arasında mübahisə yarandığını görüb.
Məlum olub ki, giriş yerinin üzərində xidmət haqqı yazılmadığından həyat yoldaşı giriş haqqı kimi 30 qəpik verib. Kassir isə qalan 10 qəpiyi verməyəcəyi təqdirdə onu ayaq yoluna buraxmayacağını bildirib.
Bundan qəzəblənən kişi əsəbiləşərək əli ilə sanitar qovşağın şüşəsinə vurub və şüşə qırılaraq yerə tökülüb. Sonra hadisə yerinə polis əməkdaşları yaxınlaşıblar.
Məhkəmənin qərarı ilə Elməddin adlı şəxs İnzibati Xətalar Məcəlləsinin 535.1-ci maddəsində nəzərdə tutulmuş inzibati xətanı törətməkdə təqsirli bilinib, barəsində 10 gün müddətinə inzibati həbs növündə inzibati tənbeh tətbiq edilib.
