İstanbul-Bakı reysi ilə paytaxta qayıdan Azərbaycan Respublikasının vətəndaşı “İphone” əvəzinə daşı bəyan etmək istəyib. Bu haqda bu gün, 1 iyun tarixində Bakuplus.az Dövlət Gömrük Komitəsinə (DGK) istinadən məlumat verir.
Vətəndaş rəsmiləşdirmə otağına yaxınlaşaraq özü ilə gətirdiyi mobil telefon cihazını gömrük orqanlarına bəyan etmək istədiyini bildirib. Gömrükçülərə təqdim edilən “iPhone 14" markalı telefon cihazının qutusunun üzərindəki İMEİ kodu şübhə yaratdığından sistem üzərindən yoxlama aparılıb. Yoxlama zamanı həmin kodun “iPhone 14 Pro Max" markalı telefona aid olduğu məlum olub.
Qutu açıldıqdan sonra orada elektrik batareyaları, çay daşları aşkar edilib. Araşdırma zamanı məlum olub ki, vətəndaş mobil telefonunu gömrük orqanına bəyan etmədən qaçaqmalçılıq yolu ilə ölkə ərazisinə gətirdiyindən, Rəqəmsal İnkişaf və Nəqliyyat Nazirliyinin müvafiq sistemində qeydiyyatdan keçirə bilməyib və həmin yola baş vurub.
