Tanışını qətlə yetirməkdə şübhəli bilinən meyxana ifaçısı Rəşad Dağlı (Əmirov) Qaradağ rayon prokurorluğuna aparılıb. Bu haqda bu gün, 10 noyabr tarixində APA məlumat verib.
Qaradağ rayon Prokurorluğunda onun təqsirləndirilən şəxs qismində cəlb edilməsi işləri həyata keçirilib. Əmirov Bakı Narkoloji Mərkəzində müayinədən keçirilib və daha sonra hadisə yerinə aparılıb.
Ötən gün, 9 noyabr tarixində 38 yaşlı R.Əmirov İsgəndər Mehtiyevə bıçaq xəsarəti yetirərək onu öldürüb. Hadisəyə səbəb həmin şəxsin Rəşadın arxasınca söyüş söyməsi olub. Sonuncu da məsələyə aydınlıq gətirmək üçün onu görüşə çağırıb və həmin gün hər iki şəxs yaşadıqları Lökbatan qəsəbəsində görüşüb.
Sosial şəbəkələrdə yayılan məlumatlara əsasən, Rəşad Dağlının öldürdüyü şəxs tanınmış meyxanaçı Ələkbər Yasamallının dayısı oğludur.
Faktla bağlı Qaradağ rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. Rəşad Əmirov şübhəli şəxs qismində tutularaq istintaqa cəlb edilib.
