Aftandil İsrafilovun dəfn vaxtı dəyişib. Sabah, 30 aprel saat 11:00-da Heydər Məscidində vida mərasimi baş tutacaq. Daha sonra, saat 12:00-da Xalq artisti "Qurd qapısı" qəbiristanlığında dəfn olunacaq. Bu haqda bu gün, 29 aprel tarixində APA məlumat verib.
14:00 - Aftandil İsrafilov "Qurd qapısı" qəbiristanlığında dəfn ediləcək
Aftandil İsrafilov bu gün bu gün saat 16:00-da "Qurd qapısı" qəbiristanlığında dəfn ediləcək.
12:00 - Xalq artisti Aftandil İsrafilov vəfat edib
Tanınmış qarmon ifaçısı, “Şöhrət” ordenli Xalq artisti Aftandil İsrafilov dünyasını dəyişib. Bu barədə Mədəniyyət Nazirliyindən bu gün, 29 aprel tarixində məlumat verilib.
Aftandil İsrafilov 1941-ci il yanvarın 24-də Bakıda anadan olub. 1961-ci ildə Politexnik İnstitutunun (indiki Azərbaycan Texniki Universiteti) tikinti fakültəsinə qəbul olunub. Qarmona olan marağı onu təhsilini atmağa və həyatını musiqiyə həsr etməyə vadar edib.
İsrafilov ”Zemfira”, “Kəmalə”, “Nazilə”, "Aynurə", "Jalə", "Basqalı" kimi 100-ə qədər musiqi əsərinin müəllifidir.
Azərbaycan ifaçılıq sənəti məktəbinin inkişafında müstəsna xidmətlərinə görə A. İsrafilov 1998-ci ildə Azərbaycan Respublikasının Xalq artisti fəxri adına, 2016-cı ildə isə “Şöhrət” ordeninə layiq görülüb. 2003-cü ildən Azərbaycan Respublikası Prezidentinin fərdi təqaüdçüsü idi.
