Bakıda “Art xronika” layihəsi çərçivəsində tədbir keçiriləcək. Bu haqda BakuPlus.az bu gün, 15 mart tarixində xəbər verir.
Tədbirdə Abşeron rəssamlıq məktəbinin Azərbaycan rəssamlarının yaradıcılığına təsiri, keçid prosesləri və müasir dövrümüzdəki rolu haqqında müxtəlif mövzuların müzakirəsi baş tutacaq.
"Art xronika" layihəsi çərçivəsində baş tutacaq tədbirin moderatoru Azərbaycan Milli Xalça Muzeyinin direktoru, Əməkdar mədəniyyət işçisi, sənətşünas Şirin Məlikova olacaq.
Natiqlər qismində kulturoloq Elçin Şamilli və Bakı İncəsənət Mərkəzinin Baş direktoru, təsviri incəsənət tədqiqatçısı Rafael Gülməmmədli iştirak edəcəklər.
Tədbirdə hal-hazırda XX-XXI əsrlər Azərbaycan Rəngkarlığı Muzeyində sərgisi davam edən rəssam Mir Nadir Zeynalovun yaradıcılığında Abşeron məktəbinin təsirindən bəhs ediləcək.
Layihə çərçivəsində keçiriləcək tədbir 18 mart, saat 19:00-da XX-XXI əsrlər Azərbaycan Rəngkarlığı Muzeyində Azərbaycan dilində baş tutacaq.
Giriş sərbəstdir.
