2 noyabr tarixində Azərbaycan Dövlət Bədən Tərbiyəsi və İdman Akademiyasında (ADBTİA) “Zəfər sərgisi” təşkil edilib. Bu haqda akademiyanın mətbuat xidməti məlumat yayıb.
Sərginin açılış mərasimində ilk öncə Heydər Əliyevin büstü qarşısına və Şəhidlər güşəsinə əklillər qoyulub. Dövlət himni səsləndikdən sonra şəhidlərin xatirəsi bir dəqiqəlik sükutla yad edilib.
Sərgidə 44 günlük müharibənin əsas məqamlarını, kədərli və zəfər anlarını, eləcə də Azərbaycan Respublikası Prezidentinin qələbə müjdəli tarixi tvitlərindən bəzilərini əks etdirən 44 fotoşəkil nümayiş olunub.
Sərgi zalında, səhnədə böyük ekranda isə 13 şəhid məzun haqqında ADBTİA Multimedia Mərkəzinin hazırladığı videoçarx göstərilib.
Tədbirdə akademiyanın rektoru Fuad Hacıyev çıxışında Vətən uğrunda canlarından keçən şəhidlərdən 13-nün ADBTİA-nın məzunu olduğu bildirib.
ADBTİA Multimedia Mərkəzinin hazırladığı, Zəfər günlərini əks etdirən 44 saniyəlik videoçarxın nümayişi ilə sərgi fəaliyyətə başlayıb.
