Bakıda itkin düşmüş şəxslərlə bağlı çəkilən “Coğrafiya müəllimi” adlı qısametrajlı bədii-sənədli filmin təqdimatı olub. Bu haqda bu gün, 17 oktyabr tarfixində Bakuplus.az Report-a istinadən məlumat verir.
Tədbir “Cinema Plus” kinoteatrlar şəbəkəsinə məxsus zalların birində baş tutub.
Baxışda Əsir və itkin düşmüş, girov götürülmüş vətəndaşlarla əlaqədar Dövlət Komissiyasının nümayəndələri, sənədli filmdə yer almış şəxslər, qeyri-hökumət təşkilatları və media nümayəndələri iştirak ediblər. Xarici iştirakçıların rahatlığı üçün filmin nümayişi ingilis dilində altyazılarla hazırlanıb.
Film Birinci Qarabağ müharibəsində könüllü olaraq döyüşlərə atılmış Şuşa sakini, 1992-ci ilin mayında Şuşanın işğalı zamanı itkin düşmüş, hələ də taleyindən heç bir xəbər olmayan Nəsir Bağırovun həyat hekayəsindən bəhs edir.
Əsas qəhrəman obrazı roluna Nəsir Bağırovun doğma nəvəsi və itkin babasının adını daşıyan məktəbli – 167 saylı tam orta məktəbin 3-cü sinif şagirdi Nəsir Bağırov çəkilib.
“Coğrafiya müəllimi”nin ssenari müəllifi Əməkdar jurnalist Mübariz Əsgərov, quruluşçu rejissoru Xəyyam Abdullazadədir.
