26 yanvar tarixində Bakıda “Müasir Audiovizual Baxış” 3-cü ənənəvi mükafatı keçiriləcək. Mükafat il boyu müasir audiovizual düşüncədə üstün olan şəxslərə təqdim olunur.
Mükafat hər həftənin şənbə və bazar günləri AVTO FM-də (107.7) yayımlanan AzerNyuMedia Şirkətinin “Cinema Radio” kino-radio kanalı tərəfindən yaradılıb.
Mərasim ilk dəfə 2019-cu ildə keçirilib. 2020-ci ildə mükafat Bakı Qısa Filmlər Festivalı çərçivəsində təqdim olunub. Müsabiqədə Azərbaycanın “Əsa” inklüziv teatrından bəhs edən “Döngə” sənədli filminin ssenari müəllifi və rejissoru Vəfa Ağabalayeva qalib gəlib.
Bu dəfə “Cinema Radio” kino-radio kanalının III “Müasir Audiovizual Baxış” mükafatında 2021-ci ilin yekunları vurulacaq və yeni laureatlar seçiləcək.
Tədbir saat 16:00-da CinemaPlus kinoteatrlar şəbəkəsinin Gənclik Mall-da yerləşən kinoteatrında baş tutacaq.
Tədbir Mədəniyyət Nazirliyi və CinemaPlus-un dəstəyi ilə keçiriləcək. Mərasimdə Azərbaycan filmlərindən saundtreklər də səsləndiriləcək. Mükafatlandırma mərasiminin sponsoru “Azman Holdinq”dir.
