Heydər Əliyev Mərkəzinin zalında dünya şöhrətli rəssam və heykəltəraşların əsərlərindən ibarət sərgi keçirilir. Bu haqda məlumat bu gün, 30 noyabr tarixində Mərkəzin İnstagram səhifəsində paylaşılıb.
Burada məşhur meksikalı rəssam və heykəltəraş Xorxe Marinin "Əl üstündə dayanan ekvilibrist”, "Dönmüş mələk" və "Külək", tanınmış ispan rəssamı Xaume Plensanın “Avtoportreti” əsərləri təqdim olunub.
Müasir pop art-ın əfsanəsi olan yapon rəssamı Yayoi Kusamanın “Sabahın çiçəkləyən gülləri” işi nadir sənət əsərlərindəndir. O, 2014-cü ildə ən çox ziyarət edilən sənətçi olub.
Daha bir müasir yapon rəssamı Mariko Morinin Heydər Əliyev Mərkəzində təqdim olunan “Dövrilik” əsəri dünyanın sferik formasını əks etdirir. Bu əsər yeni müəllifin “Dövrilik” şüşə lifli heykəllər seriyasının bir hissəsidir.
Əsərlər arasında xalçaçılıq eksponatları da xüsusi yer tutur. Xalçalar əsasında hazırlanmış “10 (-35)” və “Simvol” instalyasiyaları Heydər Əliyev Mərkəzinin foyesində nümayiş olunur. Əsərin müəllifi sənətkar Faiq Əhməd Azərbaycan xalçaçılıq ənənələri əsasında müasir əsərlər yaradır, ənənəvi xalçaları müasir incəsənətlə birləşdirib.
[URIS id=16740]
