5 noyabr tarixində Bakıda “Mədəniyyətimizin incisi – Qarabağ” sərgisi təşkil olunacaqdır. Sərgi Mədəniyyət Nazirliyinin təşkilatçılığı ilə Azərbaycan Milli İncəsənət Muzeyində saat 17:00-da baş tutacaq. Bu haqda Mədəniyyət Nazirliyinin mətbuat xidməti məlumat yayıb.
Sərginin məqsədi Qarabağa aid sənət incilərinin nümayiş etdirilməsi ilə yanaşı, bölgədə və onun tacı olan Şuşa şəhərində mövcud olmuş abu-havanı, sənətkarların yetişib boya-başa çatmasını şərtləndirən mühiti canlandırmaqdır.
Sərgidə Azərbaycan Milli İncəsənət Muzeyi, Azərbaycan Musiqi Mədəniyyəti Dövlət Muzeyi, Cəfər Cabbarlı adına Azərbaycan Dövlət Teatr Muzeyinin fondlarından seçilmiş Qarabağın qədim tarixini, mədəniyyətini və incəsənətini özündə əks etdirən eksponatlar təqdim olunacaqş
Bunlarla yanaşı, əslən Qarabağdan olan görkəmli sənət dühalarımızdan – Üzeyir Hacıbəylinin, Bülbülün və Niyazinin ev-muzeylərində onlara məxsus sənədlər, şəxsi əşyalar, hədiyyələr, fotolar, afişalar və digər qiymətli nümunələr təqdim olunacaqdır.
