3 dekabr tarixində Bakıda “Qravüra sənəti mədəniyyətlərin əks-sədası kimi” adlı sərgi keçiriləcək. Tədbirin açılışı “NUR Art House”-un təşkilatçılığı ilə eyniadlı məkanda saat 19:00-da baş tutacaq.
Sərgidə tanınmış Azərbaycan rəssamlarından Rasim Babayevin, Elçin Hami Axundovun, qravüra sənətini özünə yol seçmiş istedadlı rəssam Fidan Salahovanın və görkəmli rus rəssamı, qravüraçı İvan İvanoviç Şişkinin ofortlarının fotoları nümayiş etdiriləcək.
Tədbirin keçirilməsinin məqsədlərindən biri gələcəkdə ali təhsil ocaqlarında qravüra sənətinin tədrisini bərpa etmək və ölkəmizi bu sahədə də beynəlxalq aləmdə tanıtmaq üçün töhfə verməkdir.
Sərgi zamanı tanınmış rəssamların iştirakı ilə ustad dərslərinin təşkili, bu sahədə audiovizual materialların təqdimatı və müzakirələrin keçirilməsi nəzərdə tutulub.
