Görkəmli violonçel ifaçısı, pianoçu, dirijor, bəstəkar, pedaqoq, ictimai xadim, SSRİ Xalq artisti Mstislav Rostropoviçin 95 illik yubileyinə həsr olunmuş konsert martın 16-da Bakıdakı Rus Evində keçiriləcək. Bu haqda bu gün, 12 mart tarixində Bakuplus.az məlumat verir.
Konsert saat 19:00-da Xocalı prospekti, 20 ünvanında baş tutacaq. Konsert proqramında Üzeyir Hacıbəyli adına Bakı Musiqi Akademiyasının müəllim, tələbə heyəti və məzunları çıxış edəcəklər.
Mstislav Rostropoviç 1927-ci il martın 27-də Bakıda musiqiçilər ailəsində anadan olub. Atası Leopold Rostropoviç violonçel ifaçısı, anası Sofya Rostropoviç isə pianoçu idi. 4 yaşında o, pianoda ifa etməyə başlayır, melodiyalar bəstələyir və özü üçün bəstələr seçirdi. 16 yaşında Moskva Konservatoriyasına daxil olaraq, burada Sergey Prokofyev və Dmitri Şostakoviçdən bəstəkarlıq təhsili alıb.
Rostropoviç bir çox beynəlxalq müsabiqələrin qalibi olub. Musiqi ilə yanaşı, xeyriyyəçiliklə də məşğul olub. Həyat yoldaşı opera müğənnisi Qalina Vişnevskaya ilə birlikdə gənc musiqiçilərə kömək edən sənətkar Musiqi Fondunu yaradıb.
27 aprel 2007-ci ildə Rostrooviç Moskvada Ümumittifaq Xərçəng Mərkəzinin klinikasında vəfat etmişdir.
