Bu gün Bakıda “Yeni il möcüzəsi” adlı musiqili-əyləncəli tamaşa keçirilib. Tədbir Təhsil Nazirliyinin dəstəyi və 3 nömrəli Uşaq-Gənclər İnkişaf Mərkəzi tərəfindən Heydər Əliyev Sarayında baş tutub. Bu haqda Azərtac xəbər verib.
Tədbirdə şəhid ailələrinin övladları, müxtəlif internat məktəblərinin və ümumtəhsil məktəblərinin şagirdləri tamaşaçı qismində iştirak ediblər.
Tamaşada 3 nömrəli Uşaq-Gənclər İnkişaf Mərkəzinin teatr dərnəyinin gənc aktyorları, rəqs kollektivləri, gənc vokalçılar gənc tamaşaçıların qarşısında çıxış edərək nağıl qəhrəmanlarını canlandırıblar.
Tədbir boyu mərkəzin rəqs qruplarının ifasında qış mövzusuna aid müxtəlif rəqslər və Vətən müharibəsində qazanılan qələbə ilə bağlı rəqslər təqdim olunub.
