10 fevral tarixində Bakıda Xətai Sənət Mərkəzində “Xatirələrdə qalan oyuncaqlar” adlı uşaq yaradıcılıq müsabiqəsi keçiriləcək. Bu haqda BakuPlus Dövlət Rəsm Qalereyasına istinadən xəbər verir.
Müsabiqəyə qatılmaq üçün uşaq vaxtı ən çox sevdiyiniz və arzuladığınız oyuncağın rəsmini çəkməklə və ya istədiyiniz materialdan (metal, gil, ağac, kağız, plastilin, parça) maketini hazırlamaqla iştirak etmək olar.
Yaş məhdudiyyəti olmayan müsabiqədə iştirak etmək üçün Bakı Xətai Sənət Mərkəzi Facebook qrupuna daxil olub, təqdim edəcəyiniz əsərin fotosu ilə bərabər müəllifin adı, soyadı, təvəllüdü, təhsil aldığı məktəb və əlaqə nömrəsini yerləşdirməklə 2022-ci il fevral ayının 10-dək qoşulmaq mümkündür.
Müsabiqəyə yalnız bir əsər təqdim oluna bilər.
✓ Seçim zamanı müəllifin yaşı nəzərə alınmaqla düzgün kompozisiya əsas götürüləcək.
✓ Seçim zamanı kənar (müəllim, valideyn) müdaxiləsiz işlərə üstünlük veriləcək.
✓ Müsabiqədə xarici ölkə vətəndaşları da iştirak edə bilər.
✓ I turdan keçmiş müəlliflərin əsərləri sərgidə nümayiş olunmaq üçün, onlar Xətai Sənət Mərkəzinə dəvət olunacaqdır.
✓ Müsabiqə seçimlərindən narazı olanlar (müəllim, valideyn və şagird) seçimlərin elan olunduğu vaxtdan 3 iş günü ərzində xsm.2016@mail.ru imeyl ünvanına müraciət edə və təyin olunmuş bir vaxtda münsif üzvünün nəzarəti ilə canlı rəsm çəkməklə özlərini təsdiq edə bilərlər.
✓ Əlavə suallar üçün 0513107401 WhatsApp nömrəsinə müraciət etmək olar.
Əsəri sərgidə nümayiş olunan müəlliflər sertifikatla, fəal tədris mərkəzləri (dərnək, incəsənət məktəbi və s.) isə təşəkkürnamə ilə təltif olunacaqlar.
Mükafat fondu: sərgidən seçilmiş əsərlərin müəlliflərinin Bakı Dövlət Sirkində sərgisi və sirk tamaşasına baxış üçün 1 bilet təqdim ediləcək.
