14 yanvar Müslüm Maqomayev adına Azərbaycan Dövlət Akademik Filarmoniyasının səhnəsində Azərbaycanın xalq artisti, bəstəkar, professor Azər Dadaşovun 75 illik yubileyinə həsr olunmuş gecə keçiriləcək. Bu haqda məlumatı Filarmoniya öz İnstagram səhifəsində paylaşıb.
Konsertdə Üzeyir Hacıbəyli adına Azərbaycan Dövlət Simfonik Orkestri və Azərbaycan Dövlət Xor Kapellası bəstəkarın əsərlərini ifa edəcəklər. Orkestr dirijor Mustafa Mehmandarovun rəhbərliyi ilə çıxış edəcək. Kapellaya isə xalq artisti Gülbacı İmanova rəhbərlik edəcək.
Azər Dadaşov 1946-cı il dekabrın 1-də Bakıda anadan olub. Azərbaycan Dövlət Konservatoriyasının (indiki - Üzeyir Hacıbəyli adına Bakı Musiqi Akademiyası) bəstəkarlıq fakültəsini bitirib. O, Papa II İohann Pavelin medalı, MDB Parlamentlərarası Assambleyası Şurasının fəxri döş nişanı laureatıdır. Azər Dadaşov akademik musiqinin bütün janrlarında 150-dən çox musiqi əsərinin müəllifidir.
