Bakıda Azərbaycan əsilli fransız müəllif Baninenin “Qafqaz Günləri” əsərinə həsr olunmuş ədəbi gecə təşkil ediləcək. Bu haqda BakuPlus.az bu gün, 5 mart tarixində xəbər verir.
Tədbir Fransa Səfirliyi və Azərbaycan Fransız İnstitutu (İFA), Avropa İttifaqının Azərbaycandakı nümayəndəliyi və Art Council-in əməkdaşlığı ilə keçiriləcək.
FantazEU Avropa festivalı çərçivəsində keçiriləcək tədbirdə şairə, “Qafqaz Günləri” əsərinin fransızcadan rus dilinə tərcüməçisi Ülviyyə xanım Axundova, fəlsəfə müəllimi, Lion Normal Ali Məktəbinin məzunu cənab Bönua Filu, Bakı Dövlət Universitetinin fransız dili müəllimi, Akademik Palma mükafatının zabit dərəcəsi ilə təltif edilmiş, xanım Azelma Həsənova kimi bir çox şəxsiyyətlər iştirak edəcəklər.
Banine 1905-ci ildə Bakıda azərbaycanlı neftçi-oliqarxın zəngin ailəsində anadan olub. O, İlk Azərbaycan Xalq Cümhuriyyətinin Ticarət və Sənaye naziri Mirzə Əsədullayevin qızı idi.
Gecə üç dildə, Azərbaycan, fransız və rus dillərində keçiriləcək. Tədbir boyu fransız və Azərbaycan dillərində ardıcıl tərcümə təmin olunacaq.
Bu tədbirə qeydiyyat aşağıdakı ünvanda e-poçt vasitəsilə aparılır: FantazEU2022@gmail.com
Zəhmət olmasa ingilis, rus və ya Azərbaycan dillərində yazın.
