Bu gün, 5 yanvar tarixində əməkdar incəsənət xadimi, ustad tarzən və pedaqoq Mirzə Mansur Mansurovun doğum günüdür.
Azərbaycan SSR-nin Əməkdar incəsənət xadimi Mansurov Mirzə Mansur Məşədi Məlik oğlu 1887-ci il yanvarın 5-də Bakı şəhərində anadan olub. Uşaqlıqdan tara marağı yarandığı üçün musiqiçi olmağa qərar verib.
Mirzə Mansur Mansurov, Üzeyir Hacıbəylinin təşkil etdiyi Dövlət Türk Musiqi Məktəbində və Azərbaycan Dövlət Konservatoriyasında muğamdan dərs verib. O, Üzeyir Hacıbəylinin təşəbbüsü ilə tar sinfi üçün ilk muğam tədris proqramını tərtib edib. Bundan başqa tar alətini təkmilləşdirmiş, tarın konstruksiyasına yeniliklər gətirmişdir. Yenilik verdiyi 4 tardan biri Ermitaj, ikincisi Luvr, üçüncüsü isə İstanbul muzeylərində qorunur.
Üzeyir Hacıbəyovun tapşırığı ilə gənc bəstəkarlar Tofiq Quliyev və Zakir Bağırov Mirzə Mansurun ifasından 1930-cu illərin ortalarında "Rast", "Dügah" və "Zabul" muğamlarını ilk dəfə nota salmışlar.
Mirzə Mansur 1967-ci ildə vəfat etmiş və Bakı şəhərində, Yasamaldakı köhnə qəbiristanlıqda dəfn edilmişdir.
