Bakı Musiqi Akademiyasında istedadlı musiqiçilər arasında Beynəlxalq festival-müsabiqə keçiriləcək

Bakıda “Musiqiçilərin Pedaqoji Ustalığı” Birinci Beynəlxalq festival-müsabiqəsi keçiriləcək. Bu haqda 16 mart tarixində Bakuplus.az Mədəniyyət Nazirliyinə istinadən xəbər verir.

İyulunun 1-dən 30-na kimi Bakı Musiqi Akademiyasının 100 və BMA-nın nəzdində Orta ixtisas musiqi məktəb-studiyasının 40 illiyinə həsr olunmuş  “Musiqiçilərin Pedaqoji Ustalığı” Birinci Beynəlxalq festival-müsabiqəsi təşkil olunacaq.

Müsabiqənin əsas məqsədi müxtəlif ölkələrin istedadlı musiqiçiləri arasında əlaqələrin yaxınlaşması və genişləndirilməsi, ibtidai, orta və ali təhsil müəssisələrində bütün fənlər üzrə ümumi və peşəkar musiqi təhsilinin həm yerli, həm də xarici müəllimlərin qabaqcıl təcrübələrinin qarşılıqlı mübadiləsindən ibarətdir.

Festival-müsabiqənin şərtləri:

• Festival-müsabiqə açıq dərslər formasında keçirilir. Reqlament – 30 dəqiqəyə qədər;


• Açıq dərslərin videoyazıları YouTube saytına yerləşdirilməlidir;


• Çıxış Azərbaycan, türk, rus və ingilis dillərində (istəyə görə) olmalıdır;


• Festivalın ən yaxşı iştirakçıları diplom və sertifikatlarla təltif olunur;


• Qaliblər Beynəlxalq müsabiqənin laureatı və diplomantı adına layiq görülür. Digər iştirakçılara sertifikat veriləcək;


• Qaliblər Beynəlxalq münsiflər tərəfindən təyin olunur. Münsiflər heyətinin qərarı həlledicidir: burada nə şikayət vermə, nə də təkrar müzakirə ola bilməz;


• Festival-müsabiqənin ən yaxşı dərslərinin YouTube linkləri Bakı Musiqi Akademiyasının rəsmi saytında yerləşdiriləcək.

Festival-müsabiqədə iştirak üçün namizədlər sənədlərini 30 aprel 2022-ci il tarixinə qədər musicstudiobaku@hotmail.com elektron ünvana göndərməlidirlər.