Bakıda Britaniyada yaşayan Azərbaycan əsilli kinorejissorun filminin premyerası baş tutub. Bu haqda bu gün, 15 noyabr tarixində Bakuplus.az Azərtac-a istinadən xəbər verir.
Suad Qaranın quruluş verdiyi “Qarağ” (“Qaragh”) qısametrajlı triller filminin dünya premyerası Bakıda keçirilib. Ekran işi XIV Bakı Beynəlxalq Qısa Filmlər Festivalı çərçivəsində “Nizami” Kino Mərkəzində nümayiş olunub. Daha sonra filmlə bağlı müzakirələr aparılıb.
“İsmayıllının kəndlərindən birinə istirahət üçün getmişdim. Kənd ərazisində gəzdiyim zaman XIII əsrə aid qəbiristanlıq gördüm. Orada müharibədə həyatlarını itirən insanlar uyuyurdu. Bu mənzərəni görəndə fərqli hisslər keçirdim. Filmin ideyası da belə yarandı. Müharibənin travmaları ilə yaşayan nə qədər adam var. Həmin şəxsləri biz qəhrəman adlandırırıq. Ancaq onlar qəhrəmanlıqla bərabər bu travmaları da içlərində daşıyırlar. Adam ruhi sakitlik axtaranda ailəyə sarı gedir və düşünür ki, orada dinclik tapa biləcək”, – deyə rejissor qeyd edib.
O, filmin çəkilişlərinə başlamazdan öncə bu mövzuda xeyli müsahibələr oxuduğunu, müharibə iştirakçıları ilə söhbətlər aparıldığını bildirib. Filmin əsas mesajı ondan ibarətdir ki, müharibə travmaları heç vaxt yaddan çıxmır və onlarla yaşamağa məcburuq.
“Qarağ” filmi ruhi rahatlıq tapmaq üçün ucqar doğma kəndində yaşayan anasına baş çəkməyə qərar verən “posttravmatik stres pozğunluğu” xəstəliyindən əziyyət çəkən keçmiş əsgərin hekayəsindən bəhs edir.
