Bu gün Elmira Şabanovanın doğum günüdür.
O, 1 noyabr 1940-cı ildə Bakıda anadan olub. Atası əvvəl zavod direktoru, sonra SSRİ Ali Sovetinin deputatı olub. M.A. Əliyev adına ADİİ-də əvvəlcə aktyorluq, sonra rejissorluq fakültəsini bitirib.
Hələ İnstitutun 1-ci kursunda rejissor Rüfət Şabanovla ailə qurub. 1962-1997-ci illərdə Azərbaycan Dövlət Mədəniyyət və İncəsənət Universitetində müəllim və dosent işləyib.
Elmira Şabanova "Azərbaycanfilm" kinostudiyasında 30-a yaxın bədii filmə çəkilib. Aktrisa 2 filmə çəkildikdən sonra bir müddət kino sənətindən uzaqlaşıb.
1977-ci ildə "Bədbəxtliyin astanasında" qısametrajlı bədii filmi ilə kinoya qayıdan aktrisa xüsusilə 80-cı illərdə bir-birinin ardınca kino, radio və televiziyada maraqlı obrazlar yaradıb. Onların arasında Anarın ssenarisi əsasında və rejissorluğu ilə çəkilmiş "Qəm pəncərəsi" filmində ustalıqla oynadığı Həmidə xanım obrazı mühüm yer tutub.
