Xumar Zülfüqarova 15 noyabr 1927-ci ildə Bakıda, xalq artisti Rza Əfqanlının ailəsində anadan olub. O, 1945-ci ildə Bakı Xoreoqrafiya məktəbini bitirib.
Xumar Zülfüqarovan xoreoqrafiya və rəqs sənəti sahəsində fəaliyyətinə görə “Şöhrət” ordeninə, “SSRİ xalq artisti”, “Azərbaycan SSR əməkdar artisti” fəxri adlarına layiq görülüb.
Zülfüqarova “Yeddi gözəl” baletində, “Şah İsmayıl”, “Aşıq Qərib”, “Əsli və Kərəm”, “Leyli və Məcnun”, “Koroğlu” operalarında çıxış edib, həmçinin bir sıra kinofilmlərdə rol alıb. Rəqqasə Rusiya, İraq, ABŞ və Kanadanın müxtəlif şəhərlərində qastrol səfərlərində olub.
1950-ci ildə Bakı Xoreoqrafiya Məktəbində pedaqoji fəaliyyətə başlayan Xumar Zülfüqarova, 60 il ərzində bir neçə nəsil rəqqas və xoreoqrafın müəllimi olub. Onun tələbələri sırasında Azərbaycanın xalq və əməkdar artistləri Zita Babazadəni, Tamilla Xudayarovanı, Afaq Məlikovanı, Təranə Muradovanı qeyd etmək olar.
Xumar xanım 1945-1966-cı illərdə Azərbaycan Dövlət Akademik Opera və Balet Teatrının solisti, 1966-1978-ci illərdə Azərbaycan Dövlət Filarmoniyasının Mahnı və Rəqs ansamblının solisti və bədii rəhbəri olub. O, Dövlət Rəqs Ansamblının yaradıcılarından biri və 1978-1988-ci illərdə Azərbaycan Dövlət Qastrol və Konsert üzrə Birliyin ilk baş baletmeysteri olub.
Xumar xanım 1975-ci ildə Lənkəranda “Məhsul bayramı” üçün 2000 nəfərlik rəqs hazırlayıb, Lənkəranın “Şənlik” folklor ansamblı üçün rəqslər səhnələşdirib. Bu proqramla ansambl 1977-ci ildə Polşada keçirilən dünya festivalında birinci yer tutub.
Xumar Rza qızı Zülfüqarova 2 iyul 2017-ci ildə 89 yaşında Bakıda vəfat edib və “Qurd Qapısı” qəbiristanlığında dəfn olunub.
