Bu gün, 16 mart tarixində “Nizami” kino mərkəzində xalq yazıçısı Rüstəm İbrahimbəyovla vida mərasimi keçirilib. Bu haqda Bakuplus.az məlumat verir.
Tədbirdə yazıçının ailəsi, tanınmış ictimai xadimlər, mədəniyyət və elm nümayəndələri, ziyalılar və gənclər iştirak ediblər.
Tədbirdə Azərbaycanın mədəniyyət naziri Anar Kərimov, xalq artisti Rasim Balayev, xalq şairi Ramiz Rövşən, Azərbaycan Yazıçılar Birliyinin katibi, Xalq yazıçısı Çingiz Abdullayev, Xalq yazıçısı Anar Rzayev çıxış ediblər.
Öz çıxışında nazir Anar Kərimov İbrahimbəyovun Azərbaycanın kino, teatr və ədəbiyyat sahəsindəki böyük xidmətlərini vurğulayıb, Xalq yazıçısının ölümünü ağır itki kimi qiymətləndirib.
"O, əbədi olaraq Azərbaycan torpağına qayıtdı. Onun əsərlərini yaşatmağa ehtiyac yoxdur. Onlar özü yaşayacaq. Rüstəm İbrahimbəyovun yaratdığı "İbrus" Teatrını yaşatmalıyıq", - Xalq yazıçısı Anar Rzayev deyib.
Rüstəm İbrahimbəyov Birinci Fəxri Xiyabanda dəfn olunub.
