Paytaxt məktəbində Azərbaycan-Slovakiya mədəniyyət festivalı keçirilib. Bu haqda Bakı Şəhəri üzrə Təhsil İdarəsinin mətbuat xidməti məlumat yayıb.
Bakı şəhəri 229 nömrəli tam orta məktəbdə “Olimpiya Mədəniyyəti və Təhsil Proqramı” çərçivəsində keçirilən festivalda Azərbaycan Milli Olimpiya Komitəsinin rəhbər şəxsləri, Bakı Şəhəri üzrə Təhsil İdarəsinin müdiri Mehriban Vəliyeva, gənclər və idman nazirinin müavini Mariana Vasilyeva və şagirdlər iştirak ediblər.
Festivalda şagirdlər qonaqları Azərbaycan-Slovak dilində 31 dekabr-Dünya Azərbaycanlılarının Həmrəyliyi Günü və Yeni təqvim ili münasibətilə təbrik edib, hər iki xalqın mədəni irsini özündə ehtiva edən ədəbi-bədii kompozisiyalar nümayiş etdiriblər.
Həmçinin Slovakiya mətbəxinin ləziz təamları ilə tanışlıq və dequstasiya, hər iki xalqın milli rəqsləri, məktəblilərin ifasında səslənən mahnılar və Milad bayramına həsr olunmuş musiqili-bədii nömrə qonaqların marağına səbəb olub.
Avropa Gənclərinin Olimpiya Festivalı 2022-ci ildə Slovakiyada keçiriləcək.
