Bakı şəhəri Milli Xalça muzeyində 30 noyabr məşhur gürcü rəssamı, sənətşünas Nino Kipşidzenin “Varlığın fraqmentləri” adlı sərgisi açılır. Bu haqda Mədəniyyət Nazirliyinin mətbut xidməti bu gün, 26 noyabr məlumat verib.
Açılış mərasimi saat 19:00-da baş tutacaq. Ekspozisiyada Nino Kipşidzenin oturtma tikmə texnikasında yaratdığı 45 panno nümayiş etdiriləcək.
Nino Kipşidze rəsm və tekstil arasında orijinal texnikada işləyir. Əsərləri əsasən natürmort və mənzərə janrlarda, həmçinin fiqurativ kompozisiyalar üslubunda yaranıb. Rəssam öz əsərləri ilə gürcü tekstil sənətinin qədim ənənələrini canlandırır.
Sərgi Mədəniyyət Nazirliyi, Azərbaycan Milli Xalça Muzeyi və Gürcüstanın Azərbaycandakı səfirliyinin birgə təşkilatçılığı ilə keçiriləcək.
Sərginin kuratoru Gürcüstan Milli Muzeyinin baş kuratoru, Tbilisi Dövlət Universitetinin professoru İrina Koşoridzedir.
Sərgi 22 yanvar 2022-ci il tarixinədək davam edəcək.
