"Planet parni iz Baku" KVN teatrı 20 yaşını qeyd edir. Bu haqda Azərbaycan Respublikasının Mədəniyyət Nazirliyi xəbər verib.
Heydər Əliyev Sarayında dekabrın 13-də "Planet parni iz Baku" KVN teatrının 20 illik yubileyi münasibətilə mədəniyyət nazirinin birinci müavini Elnur Əliyev kollektivlə görüşüb. Kollektivi salamlayan Elnur Əliyev yubileylə bağlı mədəniyyət naziri Anar Kərimovun təbriklərini çatdırıb və uğurlar arzulayıb.
“Vaxtilə “Parni iz Baku” Şən və Hazırcavablar Klubunun Moskvadakı çıxışları hər azərbaycanlının qəlbini fərəh hissi ilə doldururdu. Onlar Rusiya səhnəsində mədəniyyətimizin müxtəlif janrlarını nümayiş etdirirdilər. Daha sonra bu missiya “Planet parni iz Baku” KVN teatrı tərəfindən davam etdirildi”,- Elnur Əliyev bildirib.
Daha sonra Elnur Əliyev kollektivi təbrik edərək 20 illik fəaliyyətlə əlaqədar Mədəniyyət Nazirliyinin fəxri fərmanını teatrın rəhbəri, Əməkdar artist Tahir İmanova təqdim edib. Teatrın üzvü, Əməkdar artist Bəhram Bağırzadə çıxışı zamanı fəaliyyətlərinə göstərilən diqqətə görə ilk növbədə ölkə rəhbərliyinə və Mədəniyyət Nazirliyinə minnətdarlığını bildirib.
