Bakıda dünya şöhrətli, “Qremmi” mükafatı laureatı “Kremerata Baltika” kamera orkestrinin konserti olub. “Nizami Gəncəvi İli” çərçivəsində keçirilən konsert Heydər Əliyev Mərkəzində baş tutub. Bu haqda 2 dekabr tarixində Azərtac xəbər verib.
Musiqili gecədə Əməkdar artist Fuad İbrahimovun dirijorluğu ilə Nino Rota, Frederik Şopen, Feliks Mendelsonun əsərləri səsləndirilib. Konsertdə solistlər- beynəlxalq müsabiqələr laureatı Georgiy Osokin (fortepiano), Əməkdar artist Elvin Hoca Qəniyev (skripka) çıxış ediblər.
Proqramın sonunda Fikrət Əmirovun Nizami Gəncəvinin 800 illiyi münasibəti ilə yazdığı “Nizami” simfoniyasıda yer alıb.
Bundan öncə, 1997-ci ildə yaranmış “Kremerata Baltika” kamera orkestrinin Bakıya səfəri barədə xəbər vermişdik.
