5-6 noyabr tarixlərində İçərişəhər Muzey Mərkəzində “Zəfər günü” münasibətilə silsilə tədbirlər keçiriləcək. Bu haqda Azərtac 1 noyabr tarixində xəbər verib.
Tədbirlər 30 il öncə işğal olunan torpaqlarımızın düşməndən azad olunması zamanı qazanılan qələbəyə həsr olunub.
5 noyabrda Muzey Mərkəzinin direktor məsləhətçisi, tarix üzrə fəlsəfə doktoru S.Əhmədov “Azərbaycan tarixinin şanlı səhifəsi - 44 günlük müharibə” adlı hesabatını təqdim edəcək.
Elə həmin gün Bakı Fotoqrafiya Evində “Cəbhədən xəbərlər” adlı tədbir keçiriləcək. Tədbirdə fotojurnalist Tofiq Babayevin müharibə dövründə çəkilmiş fotoşəkilləri təqdim olunacaq.
6 noyabr tarixində “Qala” Tarix-Etnoqrafik Qoruğundakı Əntiq Əşyalar Muzeyində müharibə qaziləri, şəhid ailələr, eləcə də muzey mərkəzinin müharibədə iştirak edən üzvlərilə görüş baş tutacaq.
Həmin gün İçərişəhərdə, Bakı xanları sarayının parkının ərazisindəki art zonada “İstedArt” layihəsi çərçivəsində elan edilmiş “Qələbə günü” adlı rəsm müsabiqəsi iştirakçılarının rəsmləri nümayiş etdiriləcək, münsiflər heyəti qaliblərin adlarını elan edəcək. Sərgi noyabrın 9-dək davam edəcək.
