Azərbaycan Milli Xalça Muzeyində xaricdəki şəxsi kolleksiyadan alınaraq Vətənə qaytarılan XVII əsrin əvvəlinə aid Qarabağın “Xətai” xalçasının təqdimatı olub. Bu haqda bu gün, 15 noyabr tarixində Bakuplus.az muzeyə istinadən məlumat verir.
Təqdimat Azərbaycanın ənənəvi xalçaçılıq sənətinin UNESCO-nun Qeyri-Maddi Mədəni İrs üzrə Reprezentativ Siyahısına salınması, həmçinin Xalça Muzeyinin yaradılmasının təşəbbüskarı, görkəmli alim, xalçaçı-rəssam Lətif Kərimovun anadan olması münasibətilə Mədəniyyət Nazirliyi və Azərbaycan Milli Xalça Muzeyinin təşkilatçılığı ilə keçirilib.
Həmçinin tədbirdə Şərq xalçaları üzrə beynəlxalq konfransın (ICOC) akademik komitəsinin sədri, italiyalı kolleksiyaçı, dünyaca məşhur xalça eksperti Alberto Boralevi də iştirak edib.
Səfəvilər dövrünə aid saray xalçalarının təsiri ilə yaradılmış yeni eksponatın kompozisiyasında Qarabağ xalçalarına xas stilizə edilmiş nəbati və zoomorfik naxışlar yer alıb. Xalça XVII əsrdə Qarabağda toxunub.
