Noyabrın 5-də Bakıda, Azərbaycan Milli Xalça Muzeyində 44 günlük Vətən Müharibəsindəki Zəfərinin birinci ildönümünə həsr olunmuş tədbir keçirilib. Bu haqda Xalça Muzeyinin mətbuat xidməti məlumat verib.
Tədbirdə “Qarabağın xalça xəritəsi” layihəsi çərçivəsində toxunmuş “Zəfər” xalçası və müəllifi Azərbaycanın Əməkdar Artisti Adil Şıxəliyev olan “Şuşa” qobeleninin təqdimatı keçirilib.
Azərbaycan Milli Xalça Muzeyinin direktoru Şirin Məlikova bildirib ki, Vətən müharibəsinin 44 günü ərzində muzey Qarabağ xalçalarını təbliğ etmək üçün interaktiv “Qarabağın xalça xəritəsi” tərtib edib.
"Zəfər" xalçasının ideyası Azərbaycan Milli Xalça Muzeyinin əməkdaşları tərəfindən irəli sürülüb, burada eskiz hazırlanıb və xalçanın özü toxunub. Onun yaradılması üçün 48 rəngdə ip istifadə olunub, iş üç ay çəkib," - deyə Məlikova bildirib.
Sonra “Zəfər” xalçasının bütün qədim ənənələrə sadiq qalaraq dəzgahdan təntənəli şəkildə kəsilməsi mərasimi olub.
Tədbirdə tanınmış ictimai xadimlər, İkinci Qarabağ müharibəsi iştirakçıları və qaziləri, şəhid ailələrinin üzvləri, tanınmış mədəniyyət və incəsənət xadimləri iştirak ediblər.
Gecənin sonunda şəhid övladları üçün dahi şair və mütəfəkkir Nizami Gəncəvinin 880 illiyinə həsr olunmuş kölgə teatrı janrında “Fitnə” tamaşası nümayiş etdirilib. Tamaşanı muzeyin uşaq şöbəsinin əməkdaşları hazırlayıb.
[caption id="attachment_13062" align="alignnone" width="800"]
Foto Azerbaijan Xalça Muzeyinin rəsmi Facebook səhifəsi[/caption]
