Bakıda Üzeyir Hacıbəylinin ev-muzeyi bərpa olunacaq. Bu barədə mədəniyyət naziri Anar Kərimov “Mədəniyyət Nazirliyi: 2021-ci il üzrə Hədəflər və Nəticələr” adlı konfransda bu gün, 28 dekabr tarixində bildirib.
Bərpa işlərini Heydər Əliyev Fondunun əməkdaşlığı ilə keçirmək planlaşdırılır. Nazirin sözlərinə görə, bərpa prosesi uzunmüddətlidir və bir neçə mərhələdən ibarətdir.
Üzeyir Hacıbəylinin ev-muzeyi Şamil Əzizbəyov küçəsindəki tarixi binada yerləşir. Bəstəkar 1915-1942-ci illərdə bu evdə yaşayıb. Muzey 1975-ci ildə Heydər Əliyevin təşəbbüsü ilə yaradılıb. Muzey 4 otaq, şüşəli zal, kinoteatr və sərgi salonundan ibarətdir. Bəstəkarın evi və şəxsi əşyaları Üzeyir bəyin dövründə olduğu kimi qorunub saxlanılmışdır.
