Azərbaycanda 10 şirkət yaradaraq dövlət büdcəsinə vergi ödəməkdən yayınan şəxs 7 il müddətinə azadlıqdan məhrum edilib. Bu haqda bu gün, 14 noyabr tarixində Bakuplus.az İqtisadiyyat Nazirliyi yanında Dövlət Vergi Xidmətinə istinadən xəbər verir.
Natiq Qasımov eyni vaxtda bir neçə vergi orqanında vergi ödəyicisi kimi qeydiyyatdan keçib və müxtəlif müəssisələrin rəhbəri kimi fəaliyyət göstərib.
Cinayət işinin istintaqı zamanı məlum olub ki, həmin şirkətləri digər şəxslərlə birlikdə idarə edərkən o, həmin şəxslərlə birgə dövlət büdcəsinə xüsusilə külli miqdarda – 1,5 milyon manatdan çox vergi ödəməkdən yayınıb.
Yasamal Rayon Məhkəməsinin hökmü ilə Qasımov Cinayət Məcəlləsinin “Xüsusən külli miqdarda vergidən yayınma” maddəsi ilə təqsirli bilinib. O, 3 il müddətinə dövlət və yerli özünüidarəetmə orqanlarında maddi-məsul vəzifə tutma və sahibkarlıq fəaliyyəti ilə məşğul olma hüququndan məhrum edilməklə 7 il müddətinə azadlıqdan məhrum etmə cəzasına məhkum edilib.
