12 Noyabr - Azərbaycan Respublikasının Konstitusiya Günüdür. Həmin gün 1995-ci ildə birinci çağırış Milli Məclisə seçkilərlə eyni gündə keçirilən ümumxalq referendumunda Azərbaycan Respublikasının yeni Konstitusiyası qəbul olunub.
Konstitusiyanın mətni 1995-ci il noyabrın 27-də Milli Məclis tərəfindən təsdiqlənərək qüvvəyə minib. 1995-ci ildə qəbul olunan Konstitusiya Azərbaycanın müstəqil dövlətçilik tarixinin ilk Əsas Qanunu oldu.
1918-1920-ci illərdə - Azərbaycan Xalq Cümhuriyyəti dövründə Konstitusiya qəbul etmək mümkün olmamışdı. Sovet dövründə 1921, 1927, 1937 və 1978-ci illərdə Azərbaycanın konstitusiyaları qəbul edilsə də, bunlar müstəqil dövlətçilik və suveren xalq anlayışlarına uyğun gəlməyən formal sənədlər idi.
