Bakıda “28 May” stansiyasının qarşısı və Bakı Dəmiryol Vağzalının qarşısında fərdi avtomobillərin hərəkətinin məhdudlaşdırılması məsələsinə aydınlıq gətirilib. Bu haqda bu gün, 11 mart tarixində Bakuplus.az Oxu.az-a istinadən xəbər verir.
Bu gün sözügedən ərazidə fərdi nəqliyyat vasitələrinin hərəkətinin məhdudlaşdırılması barədə məlumat paylaşılıb. Bildirilib ki, qərar Nəqliyyatı Əlaqələndirmə Şurası tərəfindən qəbul olunub. Məqsəd qovşaqda nəqliyyat mübadiləsinin və piyada axınının düzgün təşkili üçün ictimai nəqliyyat habının yaradılması, ərazinin piyadalaşdırılması və təhlükəsiz mühitin formalaşdırılmasıdır.
Məlumata əsasən, sözügedən ərazidə yalnız müntəzəm sərnişindaşıma fəaliyyəti göstərən ictimai nəqliyyat vasitələrinin hərəkətinə icazə verilir. Buradakı parklanma yerləri isə fəaliyyətini dayandırır.
Qurumdan bildirilib ki, həmin ərazidən gün ərzində 13 müxtəlif marşrut üzrə 1237 dəfə avtobus keçir.
“Avtomobillərin sıxlığı səbəbindən piyadaların təhlükəsiz hərəkəti müşkülə çevrilir. Şəhər mərkəzinin küçə parklanma yeri kimi istifadəsi səmərəsizdir. Bu nəqliyyat qovşağında piyada keçidləri yalnız yerin altında təşkil edilib. Bu da o deməkdir ki, xeyli sayda insanın keçdiyi ərazidə hərəkət prioriteti məhz avtomobillərə verilib. Nəqliyyatın bir növünün digərinə keçdiyi bu ərazinin piyadalaşdırılması və təhlükəsiz mühitin yaradılması zəruridir”, – deyə əlavə olunub.
