Bakıda ana və iki azyaşlı övladını qətlə yetirməkdə təqsirləndirilən şəxsin məhkəməsi başlayır. Bu haqda 15 iyun tarixində APA məlumat verib.
Belə ki, Nizami rayonu, “8-ci kilometr” qəsəbəsində fevralın 20-si Sabirabad rayon sakinləri 39 yaşlı Gülnar Qaraxanova, onun övladları 14 yaşlı Lamiyə Qaraxanlı və 11 yaşlı Ataxan Qaraxanlı kirayə yaşadıqları evdə kəsici-deşici alətlə qətlə yetirilmişdirlər.
Gülnar Qaraxanovanın əri TIR sürücüsüdür. Onun bacısının əri, 41 yaşlı Əhəd Əliyev baldızının ərinin ölkə xaricində olmasından istifadə edərək pul oğurlamaq məqsədilə cinayət törədib. Onun 23.000 manat borcu olub. Çıxış yolu kimi, Əliyev qohumunu öldürmək və əldə etdiyi pulla borcunu bağlamaq istəyib. Həmin şəxsin evdən apardığı pulun bir hissəsi olan 20.000 manat ondan dəlil kimi aşkar edilərək götürülüb.
Əhəd Əliyev Cinayət Məcəlləsinin 120.2.4, 120.2.7, 120.2.9, 120.2.11, 181.2.4, 181.2.5, 181.3.3-cü maddələri ilə təqsirləndirilən şəxs qismində istintaqa cəlb olunmaqla barəsində məhkəmənin qərarı ilə həbs qətimkan tədbiri seçilmişdir.
Əliyevin cinayət işi üzrə ibtidai istintaq başa çatıb və iş üzrə toplanmış materiallar baxılması üçün Bakı Ağır Cinayətlər Məhkəməsinə göndərilib. Cinayət işi hakim Azər Paşayevin sədrliyi ilə araşdırılacaq.
