Bakıda 5 aylıq qızını boğaraq öldürən şəxs barəsində hökm oxunub. Bu haqda BakuPlus.az Lent.az-a istinadən bu gün, 15 iyun tarixində xəbər verir.
Ötən ilin yanvar ayının 15-də Səbail rayonu, 20-ci sahədə yaşayan Güloğlan Nağıyev 5 aylıq qızını öldürmüşdür.
Araşdırmalar zamanı, hadisəni törədən şəxsin sözlərinə görə, o, qızını sakitləşdirmək məqsədilə üzü üstə çarpayıya uzadaraq, yorğanla üstünü tam bağlayıb. Üstünü açıb, nəfəs almadığını görərək əvvəlcə ona süni nəfəs verib, daha sonra uşağı dəhlizdə divana uzadaraq, Təcili Tibbi Yardıma zəng vurub.
Həkimlər evə gələrək, qızın artıq öldüyünü bildiriblər.
Dünyasını dəyişən körpənin anası Məriyam Nəsirova ifadəsində göstərib ki, həyat yoldaşı ondan hər zaman oğlan uşağı istəyib:
“Həyat yoldaşımla mübahisələrimizin səbəblərindən biri də Güloğlanın işləməyimə narazılıq etməsi idi. 2020-ci ilin sentyabr ayında axşam işdən evə qayıdanda, içkili olan ərim mənimlə mübahisə etdi. Məni evdən qovdu və uşaqları döydü. 2 gün parkda yatdım. Güloğlanın məni döyməsi və evdən çıxarması ilə bağlı 8-ci polis bölməsinə şikayət etdim. Daha sonra polis əməkdaşlarının köməkliyi ilə evə qayıtdım. Hadisədən bir həftə əvvəl işdən evə qayıdarkən balaca qızım Yağmurun boğazında qırmızı iz və ağzından köpük gəldiyini gördüm. Ərimin bu hərəkətlərinə baxmayaraq, işə gedərkən məcbur qalıb uşaqları onun yanında qoyurdum. Yanvarın 14-də axşam yenə də Yağmurun sifətinin göyərdiyini gördüm. Güloğlandan nə baş verdiyini soruşduqda, o əli ilə uşağın üzünü tutub, sıxdığını dedi. Dedi ki, uşaqların səsini qəbul etmir, buna səbri çatmır. Ayın 15-i saat 20:00 radələrində işdən evə gələndə, Yağmurun öldüyünü bildim”.
Bakı Ağır Cinayətlər Məhkəməsinin hökmü ilə Güloğlan Nağıyev cəzasını ciddi rejimli cəzaçəkmə müəssisəsində çəkməklə 18 il müddətinə azadlıqdan məhrum olunub.
[caption id="attachment_48610" align="alignnone" width="800"] Foto Lent.az saytı[/caption]
