Dubaydan avtomobil almaq istəyən Azərbaycan vətəndaşı Sahib Məmmədov 50 min manatdan çox vəsait ödədiyini, lakin avtomobilin başqa şəxsin adına rəsmiləşdirildiyini iddia edir.
Bakuplus.az-a müraciət edən şikayətçi bildirir ki, o, "TikTok" sosial şəbəkəsində "Rustem_dubai_avto" adlı səhifədə avtomobil satışı ilə bağlı paylaşımlar edən Rüstəm adlı şəxslə əlaqə saxlayıb. O, Rüstəmdən "Jeep Wrangler 2025" markalı avtomobil almaq istədiyini bildirib və ona sərfəli qiymət təklif olunub.
Sahib Məmmədovun sözlərinə görə, o, Gəncə şəhərindəki torpağını sataraq avtomobil almaq istəyib. Bakıda yaşayan üç qızı olduğunu bildirən şikayətçi onları rahat şəkildə aparıb-gətirmək üçün avtomobilə ehtiyac duyduğunu deyib.
İddiaya görə, Rüstəm özü Dubayda olduğu üçün behin onun tanışı "DXB Motors" MMC-nin rəhbəri Elvin Məmmədliyə verilməsini istəyib. Bundan sonra Sahib Məmmədov Elvin Məmmədliyə 2 min ABŞ dolları verib. Avtomobil hərracda alındıqdan sonra isə təxminən 23 min dollar əlavə ödəniş edilib. Rüstəm adlı şəxs bundan sonra avtomobil üçün 10 min manatdan çox əlavə xərc çəkildiyini, təkər və şüşələrinin dəyişdirilməli olduğunu bildirib. Bununla bağlı görüntüləri də alıcıya göndərib.
Vətəndaşın sözlərinə görə, əsas ödənişləri Elvin Məmmədliyə edib. İddia olunur ki, Elvin Məmmədli bu ilin iyunun 27-də pulu aldıqdan sonra ayın 28-də Dubaya gedib.
Zərərçəkmiş bildirir ki, avtomobil avqustun 25-də Hüseyn adlı başqa şəxsin adına rəsmiləşdirilib və hazırda Azərbaycanda həmin şəxs tərəfindən idarə olunur. Hüseynlə əlaqə saxlanıldıqda isə o, avtomobili şəxsi vəsaiti hesabına özü aldığını bildirib.
Hazırda vətəndaş nə avtomobili, nə də ödədiyi vəsaiti əldə edə bilir.
Sahib Məmmədov artıq məsələ ilə bağlı Daxili İşlər Nazirliyinə və Nərimanov Rayon Polis İdarəsinə müraciət etdiyini bildirir.
Qarşı tərəflərin də mövqeyini öyrənmək üçün Rüstəm və Elvin Məmmədlə əlaqə saxlamağa çalışdıq. Elvin Məmmədli ölkə xaricində olduğu üçün onunla əlaqə yaratmaq mümkün olmadı. Rüstəm adlı şəxsin nömrəsinə isə zəng çatmadı.
Məsələ ilə bağlı Bakuplus.az əməkdaşı Daxili İşlər Nazirliyinə sorğu ünvanlayıb.
Rüstəm adlı şəxs
Zərərçəkmiş Sahib Məmmədov
