Sabunçu rayonunun Muxtarov qəsəbəsində yol infrastrukturu baxımsız vəziyyətdədir. Bu haqda bu gün, 30 mart tarixində Bakuplus.az Xəzər Xəbərə istinadən məlumat verir.
Qəsəbənin Əmrulla Əliyev küçəsində yerləşən 78 saylı tam orta məktəbin qarşısında təhlükəsizlik tədbirləri görülməyib. Belə ki, ərazidə piyada zolağı silinib, tramplinlər isə dağılıb. Sakinlərin sözlərinə görə, burada dəfələrlə şagirdləri maşın vurub. Ancaq heç kim tədbir görmür.
“Burada olan sürət heç magistral yollarda yoxdur. Sürücülər heç bir nişana riayət etmirlər”, – deyə sakinlər şikayət edirlər.
Məktəb rəhbərliyi də bu səbəbdən yola çıxan əsas girişi bağlayıb, şagirdləri digər qapıdan hərəkət etməyə məcbur edir.
Yerüstü Nəqliyyat Agentliyindən məsələ ilə bağlı bildirilib ki, əraziyə baxış keçiriləcək və müvafiq addımlar atılacaq.
