Zəhərli ilanlar, vəhşi heyvanlarla dolu olan Aşağı Güzdək qəsəbəsindəki göl təhlükə saçır. Bu haqda bu gün, 17 aprel tarixində Bakuplus.az Oxu.az-a istinadən xəbər verir.
Güzdək stansiyasına yaxın ərazidə çirkabdan, kanalizasiya sularından yaranan süni göl xəstəlik mənbəyinə çevrilib. Yoluxucu xəstəliklərin tüğyan etdiyi bir vaxtda bu göl sakinlər, xüsusən də uşaqlar üçün təhlükə yaradır. Sakinlərin sözlərinə görə, vəhşi heyvanlar gölə yığışırlar.
“Aidiyyəti qurumlara dəfələrlə müraciət etmişik, amma bir nəticəsi yoxdur. Belə getsə, yeni bir xəstəliyin başlanğıcı elə burada qoyulacaq. Bu göl və çirkab, antisanitar vəziyyət bilavasitə buna səbəbdir”, - Aşağı Güzdək sakini Məhəmməd Yusifli şikayətini bidirib.
Mövzu ilə bağlı Abşeron rayonu Aşağı Güzdək bələdiyyəsinə sorğu ünvanlanıb. Özünü təqdim etməyən bələdiyyə işçisi hektarlarla torpağın su altında qaldığını deyib:
“Çirkab Binəqədi rayonundan oraya axır. Bu problemi həll etməyə yalnız “Azərsu” ASC-nin gücü çatar. Bələdiyyənin özünün də neçə hektarlarla torpağı suyun altında qalıb. Kimin xoşu gəlir ki, orada belə göl olsun?! Kənd camaatı da, biz də bu çirkabdan əziyyət çəkirik”.
