Vətəni Ərəbistan yarımadası olan Mədinə xurmasına artıq Bakının Şağan kəndində də rast gəlinir. Bu haqda bu gün, 20 yanvar tarixində Bakuplus.az ATV-yə istinadən məlumat verir.
Şağan kənd sakininin əkdiyi bu xurma ağacının yetişməsi üçün 25 il tələb olunub. Xurma ağacı qış olmasına baxmayaraq, bar verib. Ev sahibi Zaman Cəbiyev bildirir ki, hər ağacın budağında ən azı 30 kq yaxın xurma var.
Zaman Cəbiyevin həyətində 11 xurma ağacı var. Ağacların hər biri torpağa atılan tumdan əmələ gəlib. Bəzilərinin 40-a yaxın yaşı var, amma ağaclar bu vaxta qədər bar verməyib.
Zaman Cəbiyev deyir ki, xurma növləri çoxdur. Amma Mədinə xurmasının özünəməxsus xüsusiyyətləri var. Qaydalara uyğun yetişdirilməyəndə dadı elə də yaxşı olmur. İndi eşidən bilən hər kəs Zaman Cəbiyevin həyətinə gəlir, xurma ağacı ilə şəkil çəkdirib meyvəsindən dadır. Hətta kifayət qədər baha qiymətə almaq istəyənlər də var. Amma o meyvəni pay versə də, ağacını satmaq fikrində deyil:
“Çox adam gedir, gəlir. Yeyirlər, baxırlar, gedirlər. Yazda olsa idi rəngi də başqa cür olardı, şirinliyi də çox olardı. Mənə neçə min versələr də, satmaram”.
Kənd təsərrüfatı mütəxəssisləri bildirirlər ki, Ərəbistanın iqlim və torpaq şəraiti tam fərqlidir. Orada yayda temperatur 50 dərəcədən yüksək olur. Bakı ilə iqlim fərqi olduğuna görə Mədinə xurmasının bar verməsi nadir hadisə sayıla bilər.
