Xalq arasında "Neftçi Qurban" adı ilə məşhur olan Qurban Abbasov 1926-cı il oktyabrın 26-da Naxçıvan Muxtar Respublikasının Babək rayonunun Payız kəndində anadan olub. Əmək fəaliyyətinə 1944-cü ildə "Artyomneft" trestində fəhlə kimi başlayan Qurban Abbasov, sonra "Azərneft" Birliyinin qazma idarəsində qazmaçı, buruq ustası, "Gürgənneft" NMİ-nin şimal qazma sahəsi idarəsinin rəisi vəzifəsində işləyib.
Təhsilini davam etdirərək, Neft və qaz quyularının qazılması ixtisası üzrə AzNKİ-nun neft-mədən fakültəsini bitirib.
Qurban Abbasov Bakı Neft Texnikumunda təhsil aldığı dönəmlərdə əlaçı tələbə olub. 1959-cu ildə diplom işini əla qiymətlə müdafiə edib, texnik-qazmaçı sənətinə yiyələnib.
1951-ci ildə 25 yaşlı qazmaçı usta Qurban Abbasov alim, geoloq, mühəndislərlə birgə Neft Daşlarının kəşfinə görə I Dərəcəli Stalin Mükafatına layiq görülüb. O, 9 dəzgahı olan sahəyə rəis təyin olunub. Həmin sahədə hər bir dəzgahın qazma sürətini 1400 m-ə çatdırmağa nail olub.
Q.Abbasov açıq dənizdə neft və qaz çıxarılmasının ilk təşkilatçılarından biridir. "Şelf-1" tipli yarımdalma üzən qazıma qurğularının Xəzər dənizi şəraitində mənimsənilməsində onun xüsusi xidmətləri olub. Bu qurğular 200 metrlik dərinlikdə işləyə bilmiş, Kaveroçkin adına (indiki "Çıraq" yatağı) yatağı kəşf etməyə və yeni dərin perspektivli strukturlarda kəşfiyyat işləri aparmağa imkan yaradıb.
Q.Abbasovun 28 Aprel, Kaveroçkin adına, 26 Bakı Komissarı adına, Oktyabr İnqilabı adına kimi iri yataqların kəşf edilməsində mühüm xidmətləri olub. "Titan-2" üzən kranı onun adını daşıyır.
Bundan əlavə, onun şərəfinə Bakının Bayıl qəsəbəsindəki küçələrin birinə "Neftçi Qurban küçəsi" adı verilib.
Qeyd edək ki, ötən gün mərhum neftçi Qurban Abbasovun doğum günü idi.
