Səbail rayonunda yerləşən “Alov qüllələri” kompleksindəki “Fairmont Baku” hotelində yanğın-taktiki təlim keçirilib. Bu haqda BakuPlus.az bu gün, 21 aprel tarixində xəbər verir.
Təlimin keçirilməsində məqsəd hoteldə baş verə biləcək yanğınlarla mübarizə üzrə şəxsi heyətin praktiki vərdişlərinin daha da təkmilləşdirilməsi, yanğından mühafizə bölmələrinin döyüş hazırlığının artırılması, habelə hotel personalının yanğınlar zamanı ilkin davranış qaydaları barədə bilik və bacarıqlarının artırılması olub.
Təlim nəzəri və praktiki olmaqla iki hissədən ibarət olub.
Nəzəri hissədə FHN Dövlət Yanğın Nəzarəti Xidmətinin əməkdaşları tərəfindən hotelin işçi heyətinə baş verə biləcək fövqəladə hal zamanı davranış qaydaları və atılacaq ilkin zəruri addımlar barədə maarifləndirici məlumatlar verilib, “Mehmanxanaların yanğın təhlükəsizliyi” adlı videostend nümayiş etdirilib.
Praktiki hissədə isə FHN Dövlət Yanğından Mühafizə Xidmətinin yanğınsöndürənləri tərəfindən hoteldə şərti olaraq baş vermiş “yanğın” qısa müddətdə “söndürülüb”, “zərərçəkmişlərin” təxliyəsi həyata keçirilib.
Sonda təlimin nəticələri müzakirə olunub, müvafiq tapşırıqlar verilib, suallar cavablandırılıb.
