Tanınmış alim dünyasını dəyişib. Bu haqda bu gün, 25 yanvar tarixində Bakuplus.az Azərbaycan Milli Elmlər Akademiyasına istinadən xəbər verir.
Görkəmli filoloq, tədqiqatçı, mətnşünas, Azərbaycan Yazıçılar Birliyinin üzvü, AMEA-nın Məhəmməd Füzuli adına Əlyazmalar İnstitutunun direktor müavini fil.ü.e.d. professor Paşa Kərimov 65 yaşında dünyasını dəyişib.
P.Kərimov Bakı şəhərindəki 132 saylı məktəbdə təhsil alıb. Daha sonra Bakı Dövlət Universitetinin Filologiya fakültəsini bitirib. O, 1982-ci ildən AMEA-nın Məhəmməd Füzuli adına Əlyazmalar İnstitutunda işləməyə başlayıb. UNESKO-nun Dünya yaddaşı proqramı üzrə Azərbaycan Milli Komitəsinin sədr müavini idi.
Alim klassik ədəbi abidələrimizin filoloji və tekstoloji araşdırılması və nəşrə hazırlanması işi ilə məşğul olub. O, Yusif bəy Ustaclu, Vəhid Qəzvininin türkcə divanlarını, eləcə də Mirzə İsmayıl Qasir və Mirzə Baxış Vadimin şeirlərini çap etdirib.
Paşa Kərimov “Türk ədəbiyyatına xidmət baratı”, “Tərəqqi” medalı və İqtisadi Əməkdaşlıq Təşkilatının “Elm və texnologiya” nominasiyası üzrə mükafatlara layiq görülüb.
